الحقيقة عمرى ما عرفت اتكلم فى حاجة وهى سخنة .. يعنى طول عمرى باستنى لما الانفعال يخلص .. واهدى خااالص .. وبعدين افكر .. وبعدين اقرر …وبعدييييين انفذ !! وده والله مش برود ولا ايقاع واقع بس انا جربت الانفعال وانا صغير شوية وفى حاجات لسة بادفع تمن انفعالى فيها لغاية النهاردة . وكمان ما باحبش السياسة ولا باشغل دماغى بيها لان الواحد دماغه مش ناقصة بس طبعا يبقى انعدام دم لو الواحد ما اهتمش بقضايا مهمة زى قضية فلسطين كدة .
فلسطين وغزة . كلمتين متهيألى من ساعة ما اتولدنا واحنا بنسمع الاولى ولما كبرنا شوية بقينا نسمع التانية وفى الحالتين الكلمتين دول هم قضية العرب الاولى والاخيرة . وبعد الانفعال للى حصل فى غزة وبعد حرقة الدم اللى اتسبب فيها الخنازير دول اللى ربنا يولع فيهم بجاز وبعد المناظر اللى الواحد ما يرضهاش للكفار مش للمسلمين ولا للبنى ادمين وبعد المظاهرات اللى طلعت فى كل الدول العربية تندد بالاحتلال المصرى لغزة وتطالب مصر بانها تحرر فلسطين والطوب اللى اضرب على السفارة المصرية فى بيروت وكأن مصر هى اللى احتلت فلسطين وكأن مصر هى القوة العظمى التانية فى العالم طياراتنا بالالاف ودباباتنا بنوزعها ع المواطنين هدية وكأن أهل مصر غرقانين فى خير البترول ومش عارفين يودوا الفائض بتاعه فين ده غير الدهب والفوسفات والمنجنيز والياقوت والمرجان اللى ستاتنا لبساه من صباع رجليهم الصغير لشعر راسهم وشباب مصر اللى مش ملاحق على الشغل وعمال يبعتر فلوسه على نانسى وهيفا وروبى والاكل اللى بيتحدف علنا فى الشوارع واعانات البطالة اللى بناخدها م الحكومة لو لا قدر الله ما حدش فينا شغال ولا الفيلات اللى احنا ساكنين فيها فى مارينا لما عصبنا اتحل وما بقيناش قادرين على الحرب !! والعربيات الجاجوار والبورش والمرسيدس اللى مغرقة شوارع القاهرة واقضت مضاجعها !!
ده غير المطالبات بفتح الحدود مع فلسطين عشان نستضيف المليون نفر اللى فى غزة اصل المشرحة ناقصة قتلى !! الا اذا كان الهدف من الطلب ده ان اهل غزة ييجوا يموتوا عندنا م الجوع بدل ما يموتوا م الضرب !! او يا نعيش عيشة فل يا نموت احنا الكل !! وغالبا هنتنفخ احنا الكل !! وبعدين هى فلسطين اصلا 3 مليون لما يجى عندنا مليون ومليون يروحوا الاردن الارض هتفضل لمين ؟؟ولا هتبقى فين فلسطين اصلا ؟؟ ولا هو المطلوب نحارب احنا ونجوع احنا ونزيد معاقين ومصابى حرب عشان الاخوة العرب يسافروا باريس ويزودوا الرصيد فى بنوك سويسرا ويتجوزوا باميلا اندرسون !! وبعدين يقولوا المصاروة مضاروة ؟؟
والسيد حسن نصر الله بيطالبنا وهو مستخبى ورا شاشة تليفزيون وما حدش عارف هو فين اننا ننزل فى الشارع بالملايين زى ما هو نزل عشان نعلن احتجاجنا على اللى بيحصل ويا حبذما بقى لو نروح بالملايين دى نفتح المعبر ونعدى وكل 100 واحد يمسكوا عسكرى اسرائيلى وينفخوه وكأننا بنلعب صلح او طيروا او الحرب اصلا بالافراد مش بالدبابات والطيارات وان لو دبابة واحدة جات من بعيد هتفرق الملايين دى بالصلاة ع النبى !! ومش عارف ده استخفاف بعقولنا ولا قصده ايه بالظبط ؟؟ ما هو زمن ازرق ما تعرفش فيه عدوك من حبيبك . ولا هو صعبان عليه اننا مش لاقيين ناكل !!
وبعدين ليه ما حدش اتكلم ع الظابط الشهيد اللى مات بايد الاخوة الفلسطينين عشان بيشوف شغله . اكيد هتقول يجى ايه ده فى دم الاطفال ال المزيد
